【BB瞓得唔好，食保嬰丹、珍珠末、飲七星茶有用嗎？】

「BB瞓得唔好，食保嬰丹、珍珠末，或者飲七星茶有用嗎？」

「網上資料話保嬰丹可以處理夜啼易驚，珍珠末可以安神定驚，七星茶又可以幫助消化令BB瞓得好啲，係咪真架？」

以上嘅問題周不時都有媽媽問，你又會唔會都有諗過用呢啲中草藥去幫BB瞓好啲？甚至試過？🙊

飲用呢啲中草藥🌿可能對BB有用，亦可能係完全無用 😅 因為每個BB瞓得唔好、夜晚經常扎醒大喊嘅原因都唔同。中醫藥有佢哋嘅優勝之處，亦的確可以幫到唔少人解決各式各樣嘅煩惱。如果BB真係因為腸胃消化唔好而瞓得唔安穩，或者小朋友因為生活壓力而需要「定驚」，咁喺註冊中醫師嘅指導下服用中草藥，係會有助改善問題😉

不過，好多時候BB長期瞓得唔好都未必係同身體不適有關😅 BB成日扎醒喊、瞓得少、半夜又醒好多次唔肯瞓嘅原因有好多，好多時亦唔係單一原因所致，最緊要係搵出成因，先可以對症下藥啊！