踏入12月，小朋友都開始收到唔同幼稚園嘅N班/K1 offer喇！爸媽們係咪已經揀定心儀嘅學校，定係仲係十五十六唔知揀邊間好？
爸爸媽媽揀選學校嘅時候，除咗可以考慮學校課程、環境、師資等因素外，亦不妨考慮吓上堂嘅時間（上午班/下午班）同搭校車所需嘅時間。
返N班嘅小朋友只係兩歲至兩歲幾，呢個歲數每日仍然需要有一次小睡，所以最理想係揀選上午班，等小朋友放學食完午飯可以小睡片刻。如果只有下午N班嘅選擇，咁樣就會影響咗佢哋嘅作息時間，返學前父母要按住小朋友嘅生理時鐘同作息習慣重新調整，小朋友亦需要一段時間去適應。
至於K1，上午班都係較下午班優勝少少，因為部分三歲嘅小朋友仍需要午睡，如果想跟隨小朋友本身嘅睡眠發展同生理需要，上午班會較為可取。不過，如果父母同小朋友非常心儀嘅學校只有下午班嘅選擇，父母都無需太擔心，相對兩歲時，三歲後返下午班會更易適應。小朋友三歲開始，午睡嘅必要性已經大大降低，部分小朋友只要夜晚有足夠嘅休息，瞓到10-12個鐘，無午睡亦無太大影響。
希望以上分享都可以幫到爸媽揀選合適嘅學校啦😉
Comments