【1歲的睡眠倒退期】

BB滿咗一歲，各方面都會比到好多驚喜爸爸媽媽，佢會開始識得自己行幾步，或者叫聲你爸爸媽媽。當你以為BB一歲大就會瞓得更好？未必㗎！因為一歲BB好可能會經歷一歲睡眠倒退期，而今次嘅睡眠倒退期對日間小睡影響最大。

一般一歲大嘅小朋友日間已經穩定地有兩次小睡，不過去到一歲左右，有啲小朋友會突然唔肯小睡、需要好長時間先真正入睡，又或者夜晚頻頻醒來，有時可能自己玩下就瞓，但有時就需要爸爸媽媽半夜同佢開party😥😥 呢啲都係一歲睡眠倒退期嘅徵兆。

小朋友去到一歲，無論喺活動能力、認知能力、語言能力方面都迅速發展，佢哋希望把握每一個時機去學習，往往會為睡眠帶來負面影響。

經歷一歲睡眠倒退期嘅時候，有啲父母會誤以為BB日間只需要一次小睡，結果令BB過分疲勞，夜醒嘅問題反而惡化。其實一歲大嘅小朋友，絕大部分需要兩次小睡，要到大約15至18個月先係另一個小睡轉換期！

相比之前嘅睡眠倒退期，一歲嘅睡眠倒退期可能會更具挑戰性，因為小朋友長大咗，開始會表達自己嘅意見，所以爸爸媽媽一定要搵啱小朋友嘅方法去處理，避免喺呢個時期同小朋友建立唔健康嘅睡眠習慣。

如果你正在經歷小朋友嘅睡眠倒退期，覺得好苦惱，又好想藉此幫小朋友調整睡眠，歡迎你inbox我傾下。