4個月睡眠倒退期一般係BB大約四個月大嘅時候出現，但係有啲BB可能早係兩至三個月大就已經會經歷。呢次嘅睡眠倒退期係BB經歷嘅其中一個非常重要同顯著嘅時期，會對BB嘅睡眠模式有永久性嘅改變。
四個月大嘅BB睡眠發展漸趨成熟，佢哋嘅睡眠模式會慢慢改變，可以發展到有一個完整嘅睡眠周期，有深層睡眠同淺層睡眠，所以當佢哋完成一個睡眠周期嘅時候，佢哋好可能會醒一醒，如果唔能夠自己銜接下一個睡眠周期，就會大喊求救😫
而且四個月大亦係BB活動發展嘅一個重要時期，佢哋會開始學習轉身，唔單止醒咗嘅時候會練習，甚至瞓覺嘅時候都想把握時間練習轉身，令佢哋嘅睡眠受影響。
所以如果你BB頭幾個月一直瞓得好好，去到大約四個月時突然日頭瞓得唔好，夜晚又成日醒，佢好大可能係經歷緊四個月睡眠倒退期。記得要多加留意，盡快同BB培養良好嘅睡眠習慣。呢個時期嘅轉變對BB嘅睡眠模式有一定嘅影響，記得要好好把握時機，幫BB調整睡眠，咁樣可以避免好多往後嘅睡眠問題㗎！
Comments