【8個月睡眠倒退期】

8個月睡眠倒退期會喺BB八至十個月嘅時候出現，呢次睡眠倒退期主要係因為BB嘅活動發展迅速，而且出現更明顯嘅分離焦慮症。

喺呢個時期，好多BB都會學坐、學爬，甚至扶住啲嘢企起身。為咗練習呢啲新嘅技能，好多BB都會不分晝夜努力練習😅😅，所以有啲父母會發現每次一放低BB喺床仔，佢哋就會扶住企起身唔肯瞓低🙈🙈

八個月左右亦係BB分離焦慮症嘅一個高峰期， BB開始好認人，好痴身，所以爸爸媽媽放低佢喺床仔，要佢同你哋分開，佢當然會好唔捨得，大喊大叫啦😢 正正係咁，好多BB自此就會養成抱睡、同大人同床瞓嘅習慣🙈

所以爸爸媽媽應該要「堅守防線」，唔好係呢個時期同BB建立唔健康嘅睡眠習慣，反而應該把握機會，培養良好嘅睡眠習慣，等BB之後都可以瞓得更好！