【如何應對初生BB黃昏至夜晚嘅哭鬧】

琴日分享咗三至六週大嘅BB點解黃昏至夜晚都好似特別扭計，哭鬧較多，如果遇到呢個情況，爸爸媽媽可以參考以下嘅方法，協助安撫BB嘅情緒😉

1️⃣ 檢視BB嘅作息

初生BB每次醒嘅時間唔長，大多數一個鐘左右就要瞓覺，記得唔好令BB過分疲勞，減少疲累感覺嘅累積。記住，日頭唔俾佢瞓就代表夜晚瞓得好好係一個睡眠謬誤，日頭瞓唔夠反而會令BB黃昏至夜晚嘅哭鬧更多更嚴重㗎！

2️⃣ 密集式餵奶 (cluster feed)

正如之前所講，三至六週大嘅BB好可能經歷緊猛長期，而且佢哋夜晚嘅睡眠時數開始加長，都需要喺臨瞓前食多啲，如果BB真係肚餓，佢哋一定會哭鬧得更多，所以媽媽可以試吓餵奶餵密啲 🤱

3️⃣ 減少刺激

試觀察下BB喺黃昏前會唔會受到好大嘅刺激，令佢哋難以安定落嚟。例如哥哥姐姐放學返屋企、屋企人放工返嚟見到BB太開心太興奮、太多人嚟探BB 等等。BB仲喺媽媽肚入面嘅時候係漆黑一片，唔會見到五光十色嘅世界，但係當佢哋出世之後，有唔同嘅聲音同畫面，呢啲對佢哋嚟講都可以係好大刺激㗎！

4️⃣ 用身體接觸安撫BB

可以試吓比BB挨住你心口，聽住你嘅心跳聲，增加BB嘅安全感。

5️⃣ 同BB沖涼

喺水入面BB會覺得好舒服，有安撫作用，好似喺媽媽肚入面咁☺️ 同BB沖涼嘅時候亦都可以同佢地溫柔地按摩下，令佢地放鬆。

6️⃣ 利用搖晃嘅感覺

可以試吓抱住BB攬住BB，模仿佢哋喺子宮入面，媽媽行路時搖晃嘅感覺，令佢哋平靜落嚟。

7️⃣ 適當嘅時候搵人幫手

係，媽媽嘅地位係無人可以代替， BB離開媽媽嘅子宮後，覺得最安全一定係返去媽媽身邊，不過如果BB每日都有咁樣哭鬧嘅情況，對媽媽都會產生好大好大嘅壓力，所以喺適當嘅時候要搵人幫手照顧同安撫BB，先遠離BB嘅喊聲，等自己休息一陣，再繼續照顧BB。