分離焦慮係BB成長階段嘅一個正常發展，所以當你離開咗BB，佢覺得好唔開心，大喊想搵返你，呢啲都係好正常嘅表現呀！喊，係佢表達內心感受嘅一種方式😉😉 我哋唔可以令BB嘅分離焦慮立即結束，但係可以試吓用唔同方法幫佢哋渡過呢個時期，等佢哋感覺好啲，建立更親密嘅親子關係。
1️⃣ 適時回應
分離焦慮嘅BB對於突然嘅轉變會感到不安，當BB有負面情緒嘅時候，爸爸媽媽可以作出正面嘅回應，給予支持同鼓勵，唔需要擔心咁樣會竉壞BB，令佢哋更加痴身，適當嘅回應其實會令BB更有安全感，令佢哋更容易渡過分離焦慮☺️
2️⃣ 預告即將會發生嘅事
嬰幼兒都喜歡有規律嘅生活，因為咁樣佢哋可以「預知」會發生咩事，令佢哋更加安心。所以如果要同BB去一啲比較陌生嘅環境或者見到陌生嘅人，可以預先同BB講吓即將會發生嘅事，等佢哋有一定嘅心理準備。
3️⃣ 睡前規律
BB要瞓覺難免就會發現自己同媽媽分開咗，有可能會有不安嘅情緒，但有固定嘅睡前規律可以讓BB知道即將係瞓覺時間，令佢哋覺得更安心，減少因為媽媽離開而哭鬧。
4️⃣ 要講「再見」👋
BB雖然識得表達嘅唔多，但佢哋係可以理解到好多嘢。如果你要離開BB一陣，記住要同佢哋講再見，唔好靜雞雞走咗去。喺離開前同BB講定你幾時會返嚟，開開心心同佢講bye bye。咁樣佢會更容易了解發生緊咩事，明白媽媽唔係「突然消失咗」😅😅
5️⃣ 玩「躲貓貓」遊戲
Peekaboo 呢個躲貓貓遊戲唔單只係可以氹BB開心，更可以令佢明白媽媽唔見咗會再次出現嘅情況。剛剛開始嘅時候，可以用紗巾遮住自己塊面，然後好快拎開，慢慢延長遮住自己嘅時間，等BB明白「媽媽消失咗係會再返嚟」😉
6️⃣ 善用可以安撫BB嘅玩具或者物件
如果要帶BB去一個比較陌生嘅地方，甚至要交低BB比其他人照顧一陣，可以帶埋BB熟識嘅玩具或者物件，例如公仔、安撫巾、睡袋等等，呢啲物件對BB都有一定嘅安撫作用。
7️⃣ 放鬆心情
BB絕對可以感受到大人嘅心情，如果爸爸媽媽自己都好緊張、好唔捨得， BB自然都會覺得好緊張同擔心。所以如果要離開BB一陣，記得要盡量保持愉快嘅心情，輕輕鬆鬆、開開心心同BB講再見，咁樣可以令BB明白其實爸爸媽媽離開只係一件小事，好快佢哋就會返嚟喇😉
分離焦慮係BB成長嘅一個過渡期，爸爸媽媽只要作出正面嘅回應， BB嘅安全感慢慢會增加，可以順利過渡呢個階段。如果你BB都有分離焦慮，唔使緊張、唔使擔心，咁樣其實代表你同BB嘅親子關係好健康、好close呀❤️
Comments