日夜顛倒呢四個字相信好多爸爸媽媽都聞之色變🙈 但係呢個情況其實喺BB初生階段係非常常見。初生BB晝夜節律 (circadian rhythm)未太成熟，好容易出現日夜顛倒嘅情況，佢哋日頭瞓得好好，可以連續瞓幾個鐘，但係夜晚會好精神唔肯瞓，或者瞓好短時間就起身食奶。
如果你嘅BB都有日夜顛倒嘅情況，可以試吓以下嘅方法，幫佢哋設定正確嘅生理時鐘。
1️⃣ 日間喺BB清醒嘅時候比佢哋多接觸陽光，可以帶佢哋去窗邊曬吓太陽，感受下自然光，同佢地多啲交流，傾吓計。不過，記得就算BB有日夜顛倒嘅情況，佢哋日間瞓覺嘅時候，房間都要盡量黑暗。只要喺佢哋醒咗食奶或者玩緊嘅時候俾佢哋接觸陽光就可以😉
2️⃣ 夜晚睡眠環境要黑暗，即使半夜要起身餵奶，都只係需要開盞小夜燈，而且唔好同BB玩，讓佢哋安安靜靜食奶，掃完風就比BB繼續瞓覺💤
3️⃣ 留意BB日間小睡時間，如果BB日間已經連續瞓咗兩個鐘或以上，就需要溫柔地叫醒BB，餵完奶玩一陣再比佢哋瞓過。如果BB日間每次小睡時間太長，佢哋日間會食少左奶，變相夜晚就會肚餓，相對夜晚嘅睡眠時間就會縮短🙈 爸爸媽媽可以控制BB每次小睡嘅長度，提醒佢哋日間小睡應該係短啲，夜晚先係長睡眠嘅時間。不過記住，咁樣並唔代表日頭唔俾BB瞓覺呀！初生階段BB日間需要6至8小時嘅睡眠㗎！
Comments