BB剛剛出世頭一個月，父母嘅休息時間難免會減少。初生BB喺生活各方面都未太穩定，不時都有唔同嘅變化。睡眠方面亦一樣，可能有時瞓得好，有時瞓得唔好。喺照顧初生BB嘅睡眠時，爸爸媽媽可以留意以下幾樣野：
💫 選購最實用嘅嬰兒產品
BB出世前，準爸爸媽媽都會搜羅一系列嘅嬰兒產品，邊樣最好用，邊樣冇乜用，準父母都要做唔少功課😅😅 如果想提升BB嘅睡眠質素，以下三樣嘢都會幫到手：
包被/包被睡袋
白噪音機
遮光窗簾
至於用唔用安撫奶嘴，呢個取決於準爸爸媽媽嘅意向。安撫奶嘴對初生階段嘅BB的確有一定嘅安撫作用，亦可減少嬰兒猝死症(SIDS)嘅風險。不過未必每個BB都肯用😅 仲有，埋身餵人奶嘅媽媽，要等BB埋身食得叻啲先好畀安撫奶嘴，以免令BB造成混淆，難以分辨奶嘴同乳頭。
💫 毋需擔心BB跟唔上時間表
有啲爸爸媽媽好心急為BB設定一個時間表，希望BB可以定時定候瞓覺飲奶。不過，初生BB 嘅睡眠發展未成熟，有時會瞓得短啲，有時又瞓得長啲，未算好穩定，如果急於要求BB跟上時間表，會為自己帶嚟太大壓力㗎！
💫 日間有需求可以溫柔地叫醒BB飲奶
BB瞓得到都係好事，但係如果BB習慣日間瞓得好好，瞓得好長，有可能會造成日夜顛倒嘅情況。所以如果日間BB已經連續瞓咗兩至三個鐘，就需要溫柔地叫醒佢，咁樣一來可以確保BB日間食得足夠（初生BB每2-3小時就要飲奶喇），二來可以避免BB出現日夜顛倒，日間瞓得多，夜晚好精神唔肯瞓 🙈
照顧初生BB需要好多心機同精力，唔少準爸媽可能不禁會問：「我可以做啲令BB瞓好啲，等我可以盡量休息多啲？」
有！多了解初生階段BB嘅睡眠需要，並作出相應嘅配合，可以幫你更輕鬆渡過初生階段呢個既甜蜜又痛苦嘅時期😉 以下嘅文章可以幫到你👇
｜初生階段睡眠需要｜https://www.jovialsleepers.com/post/%E3%80%900-3%E5%80%8B%E6%9C%88-%E5%AC%B0%E5%B9%BC%E5%85%92%E7%9D%A1%E7%9C%A0%E9%9C%80%E8%A6%81%E3%80%91
｜安睡小貼士｜https://www.jovialsleepers.com/post/%E3%80%90-%E5%AE%89%E7%9D%A1%E5%B0%8F%E8%B2%BC%E5%A3%AB-%E5%88%9D%E7%94%9F%E9%9A%8E%E6%AE%B5%E3%80%91
講到初生BB嘅睡眠，我覺得最重要係爸爸媽媽嘅心態😉 初生BB睡眠發展未成熟，好多時會出現與預期有落差嘅情況，所以做好心理準備，調整心態，知道可以點樣應對，就會處理得更輕鬆😊
照顧初生BB唔係容易嘅事，爸爸媽媽要盡量爭取時間休息， BB瞓咗，自己都快啲去休息吓 💪
Comments