「放晒佢啲電，今晚一定好好瞓啫…… 」
呢句說話，相信你會聽過，甚至講過😆 到底帶BB出街放電係咪真係可以令佢哋瞓得好啲呢？
答案可以係，亦可以唔係🤨 因為「放電」真係並非萬能！
嬰幼兒嘅睡眠其實同成年人嘅睡眠好唔同，佢哋攰得滯係會瞓得更差😞
當BB放晒所有電，甚至攰到電量變咗負數嘅時候，就會好容易出現過分疲勞嘅情況，佢哋嘅身體會釋出壓力荷爾蒙—皮質醇，令佢哋難以入睡、難以安睡，夜醒次數反而會增加。
月齡較細嘅BB每日所需嘅睡眠時數較長，如果佢哋經常出街放電，難免會瞓得少咗，就好容易會出現過分疲勞嘅狀態喇！加上出街放電嘅時候BB會見到唔同嘅嘢、聽到唔同嘅聲音，對佢哋可以係一種刺激，影響佢哋嘅睡眠質素。
當BB去到歲半後，睡眠發展愈嚟愈成熟，加上全日活動時間長咗，出街放電會更適合。有更多嘅活動空間、更長嘅活動時間，會有利小朋友產生更多睡意，有助入睡😉 不過，千祈唔好以為咁就可以不停去「放電」吖！因為頭幾年嬰幼兒都需要瞓十幾個鐘，過份放電會令睡眠問題慢慢浮現㗎！
Comments