有啲BB/小朋友出咗街都可以好好瞓，作息唔會受太大影響，但有啲出街就好似唔駛瞓咁（佢哋覺得自己唔駛瞓😅🤣）... 對於呢啲小朋友，爸爸媽媽想佢哋出街都可以小睡，就可能需要出盡各種招式🙈 無計啦，每個小朋友嘅性格都唔同，出咗街咁多野睇、咁多野聽，佢哋真係會難啲可能好似平時小睡咁瞓得咁好嘅！
不過，咁唔代表唔可以同佢哋嘅出街嘅！可以試用8️⃣. 2️⃣ 原則 — 八成時間喺屋企瞓，兩成時間喺屋企以外嘅地方瞓😉😉 同埋，有定心理準備，出街當日（甚至之後一兩日），小朋友整體作息時間可能會亂咗，有機會會扭計啲㗎！
咁如果會帶佢哋出街，可以點樣安排？最理想嘅做法係：
✅ 選擇喺佢哋平時嘅活動時間出街
✅ 選擇平時瞓得較短嘅小睡時間出去（大多數BB晏晝嘅小睡時間相對會較長，所以如果可以朝早出去，下午比小朋友返屋企休息，就會更易處理。）
✅ 夜晚盡早返屋企，提前就寢時間，俾小朋友夜晚瞓番夠
如果出街嘅時間比較長，爸爸媽媽可以試吓以下嘅方法：
⭐️ 早上👇
✅ 延遲當日起身嘅時間，比BB瞓耐啲，令BB全日嘅作息時間表都向後延遲
⭐️ 起身後/下午/傍晚👇
✅ 喺平時嘅小睡時間，比佢哋喺BB車度瞓（BB車可以平瞓，而且較容易營造一個比較暗嘅環境比小朋友休息）
✅ 如果BB小睡瞓得到，可以比佢哋瞓耐啲，唔好叫醒佢哋，咁就算佢哋當日夜咗瞓，都唔會過分疲勞
✅ 按 BB實際睡眠需要，加插多一次小睡時間
⭐️ 夜晚回家途中👇
✅ 回家途中，如果BB太攰，可以比佢哋喺車上瞓20分鐘左右（記住瞓一陣就夠喇，如果唔係佢哋返到屋企可能要好夜先至肯瞓㗎）
✅ 如果BB唔肯瞓，可以俾佢自己休息一下，俾啲安靜時間佢，唔好再進行過分刺激嘅活動
✅ 如果BB已經瞓着咗，點樣叫都唔想醒，咁唯有返到屋企直接俾佢去BB床瞓覺，然後第二日就重新換過所有床單睡袋🙈 （呢個係冇辦法之中嘅辦法，始終出街細菌病毒都多，尤其是係疫情期間，如果可以嘅話，返屋企可以沖個涼先瞓覺就更好）
最後，有一點 #好重要 ：出咗街，小睡前都盡量做番一直做開嘅睡前儀式 （當然有啲步驟可能做唔到要省略）。可以試下搵個靜少少嘅位，做番睡前儀式，話俾小朋友聽夠鐘瞓覺喇💤 （第一次，你可能覺得睡前儀式出街未必好幫到你，但係當你堅持每一次都做嘅時候，小朋友就會慢慢明白就算出咗街，做睡前儀式都係代表佢哋要休息😉）
每個小朋友嘅個性都唔同，未必每個人出街都可以瞓得好，對於某啲小朋友來講，出街真係實在有太多嘢可以探索，佢哋就相對會休息得唔係太足夠。不過，如果小朋友一直有良好嘅睡眠習慣，一日半日作息時間唔同咗，影響都唔會太大嘅😊
Comments