有啲爸媽會話小朋友出完街夜晚瞓好咗，但亦有唔少話小朋友係瞓得差咗🤦♀️ 到底點解呢？😅 喺度想同大家分享下各個原因😉
💫 小朋友嘅年齡
年紀較大嘅小朋友所需嘅睡眠時數相對較少，所以就算一日半日出街瞓少咗，影響亦會細啲。相反，月齡越細嘅BB，每日需要瞓嘅時數較長，出街嘅時候難免休息少咗，佢哋無能力應付咁長時間嘅活動時間，就好容易會攰得滯，令身體釋出過多壓力荷爾蒙，睡前哭鬧可能較嚴重，亦會影響夜晚睡眠質素。
💫 當日作息
如果出街嘅時候都可以大致上維持平時嘅小睡次數同時間， 小朋友無咁容易玩到攰得滯，夜晚嘅睡眠大多都唔會受到影響。但係如果日頭無小睡，或者夜晚臨瞓前玩得太長時間，嗰晚就有可能瞓得比平時差喇！
💫 曬太陽
外出如果進行戶外活動，小朋友接觸多咗陽光，有機會夜晚係瞓得更好㗎！因為我哋嘅睡眠荷爾蒙—褪黑激素係由血清素 (serotonin)轉化而成，當我哋接觸到足夠嘅陽光，可以令身體產生足夠嘅血清素，夜晚血清素就會變成褪黑激素，話比身體聽夠鐘瞓覺，有助入睡同安睡。
💫 溫度
太凍或者太熱都會令小朋友瞓得無咁好，有時候出街進行戶外活動，曬咗太陽，身體嘅核心溫度會提升。如果夜晚瞓覺嘅時候衣着、睡袋厚度一樣，房間溫度無調整， 小朋友可能會覺得比平時熱，亦會瞓得無咁好。所以同陽光玩遊戲之後嗰晚，爸爸媽媽可以考慮調低房間溫度少少，環境涼快啲，小朋友都會瞓得舒服啲 😴
💫 活動嘅刺激性
出街會見到、聽到唔同嘅嘢，對小朋友嚟講係唔同嘅刺激，都有機會影響佢哋睡前嘅情緒，同埋增加夜晚發夢嘅機會 🙈
💫 活動量
去到幼兒階段小朋友多咗好多大肌肉嘅鍛鍊，出街多咗機會同時間跑跑跳跳，如果當日嘅活動量大，例如做咗運動，小朋友嗰晚可能會覺得攰啲，會比平時更熟睡😉
Comments