臨近聖誕新年，唔少爸爸媽媽都可能打算帶BB去主題樂園玩，感受下節日嘅氣氛。不過，有時候爸媽們會反映，同仔仔囡囡去完主題樂園玩之後佢哋就瞓得特別差🙈🙈
呢個情況的確有機會出現㗎！因為…
👉 去玩足全日，小朋友嘅作息難免受到影響，日間休息唔足夠或者太夜瞓，會令身體過分疲勞，夜晚睡眠質素會下降
👉 主題樂園五光十色，又有唔同嘅聲音，對嬰幼兒嚟講係一種刺激，會令佢哋過分興奮，較難收拾心情休息，加上主題樂園獨特嘅光效同聲音亦有可能令佢哋容易發夢
👉 出街玩咗一日，有時會食少咗野，甚至skip 咗一餐，有啲小朋友就會臨瞓前/半夜肚餓，較難熟睡
想盡量減少對BB嘅影響，爸爸媽媽可以留意以下幾點：
✔️ 盡量維持BB原有嘅小睡時間，喺合適嘅時候畀佢地瞓一陣，避免活動時間過長令佢哋攰得滯
✔️ 夜晚盡早返屋企，提早BB嘅就寢時間，等佢哋夜間有足夠嘅休息
✔️ 考慮吓主題樂園邊樣活動較適合小朋友，揀選合適嘅活動，避免過分刺激（月齡愈細嘅BB，對光線、聲音、氣味都會較為敏感）
✔️ 記得要餵足咁多餐，唔好因為掛住去玩令BB全日嘅吸收量大跌
✔️ 注意天氣變化，BB著得太多/太少都容易病㗎！出入室內室外時注意溫度變化，陽光普照嘅日子亦要記得要補充水份
一家人出去玩，係一件好開心好甜蜜嘅事☺️ 只要做好準備，調整心態，偶然出去玩耐啲，對小朋友嘅作息都唔會有太大影響嘅😉
Comments