「我想訓練BB去到邊都瞓得到，可以嗎？」
「BB好似去邊都瞓得著，咁樣係好定唔好？」
唔知你地對上述問題有咩睇法？😉 每隔一段時間我都收到媽媽們問類似嘅問題，今日想同大家從嬰幼兒睡眠發展嘅角度分享下我嘅睇法😊
到底BB可唔可以「去到邊都瞓到」、「喺BB車都可以瞓好耐」，係好視乎兩個因素👇
第一係月齡，初生階段嘅BB大多都係較容易做到，佢哋坐住BB車或者父母用孭帶孭住，搖下搖下咁，去到咩地方都好容易瞓得著 💤 另外，去到大約一歲半後，小朋友嘅睡眠發展越嚟越成熟，都會較容易出街時候喺BB車瞓耐啲。
另一個因素係小朋友對外在環境嘅敏感程度。不得不否認，有啲BB天生對事物敏感度較低，相對無咁容易受外在因素影響瞓唔到，所以佢哋未必需要特別多嘅配合，已經係可以好輕鬆咁喺BB車/car seat/孭帶度瞓好耐😌 但好多BB對周遭嘅事物同聲音特別敏感，去到唔同地方，見到嘅畫面同聽到嘅聲音唔同咗，佢哋就比較難入睡同安睡。
做咗爸爸媽媽我哋梗係想有社交生活，想去街就去街，想同朋友食飯就食飯，所以如果BB真係可以去到邊都瞓到，大人出街唔會影響佢哋嘅作息，咁就係完美啦🤪
不過，正如上述所講，能唔能夠做到都要睇唔同嘅因素。喺行內我哋無一套特定嘅方法訓練BB去到邊都瞓得到😅 始終喺穩定、平靜嘅環境下瞓覺，BB嘅睡眠質素係最好。出街就算瞓到，睡眠質素都會大打折扣。
當然， BB仔都可以出街，同埋應該要出下街嘅，所以父母應該喺出街同休息之間取得平衡😉 我一般建議父母可以安排有80%嘅日子比BB喺屋企有一致嘅作息環境，20%嘅日子帶BB出去睇下野，咁對嬰幼兒作息嘅影響就會減到最低。
仲有一點大家要留意，如果你嘅小朋友經常一出街搖下搖下就秒睡，但係總係瞓吓醒下咁，就要留意小朋友會唔會平時一直都休息唔足夠，以致佢哋經常好快斷電好容易恰着喇！
Comments