你嘅小朋友有冇試過喺夜闌人靜嘅時候，突然尖叫大喊？你可能會諗，到底佢係發噩夢定係出現夜驚嘅情況......
相信無論係邊個情況，父母都會覺得困擾同擔心。所以我哋需要了解噩夢 (nightmare)同夜驚 (night terror)嘅分別，搵出小朋友夜晚尖叫大喊嘅原因，先可以對症下藥，解決問題。
🙋🏻♀️🙋🏻♂️ 小朋友幾大會出現噩夢或者夜驚？
所有歲數嘅小朋友都會發噩夢，但夜驚症較常見於三至八歲嘅小朋友身上，而且男仔比女仔較容易出現夜驚。
🙋🏻♀️🙋🏻♂️ 咩時候出現？
噩夢多數發生喺淺層睡眠嘅時候，由於接近天光嘅時候小朋友大多處於淺層睡眠狀態，所以喺後半夜發噩夢嘅機會較高。相反，夜驚多數發生喺小朋友熟睡嘅時段，一般係小朋友就寢後幾個鐘頭內出現，每次維持5至20分鐘。
🙋🏻♀️🙋🏻♂️ 小朋友喺行為上有咩分別？
發噩夢嘅小朋友會有恐懼嘅感覺，相對比較容易安撫。由於發噩夢嘅時候大多數係處於淺層睡眠階段，小朋友好大可能會扎醒，而且對夢境有印象。但出現夜驚嘅小朋友喺尖叫大喊時並無意識，對四周嘅事物都冇太大反應，有時候就算爸爸媽媽同佢哋講嘢，佢哋好大可能都係瞌埋眼大喊，比較難安撫，而且瞓醒後小朋友唔會記得發生咩事。
🙋🏻♀️🙋🏻♂️ 點解會出現？
發噩夢多數同一間嘅刺激有關，最常見係日常生活中有壓力或者感到焦慮。而且小朋友睇完電子產品後大腦受過分刺激，都會導致佢哋成日發噩夢。而夜景多數同遺傳有關，但係若果小朋友長期睡眠不足、過分疲勞、壓力過大或者過分焦慮，亦較常出現夜驚嘅情況。
🙋🏻♀️🙋🏻♂️ 出現嘅時候應該點樣處理？
小朋友發噩夢嘅時候會實實在在感到恐懼，爸爸媽媽可以俾多啲安撫，等佢哋盡快瞓番。若果小朋友出現夜驚嘅情況，父母第一步係保持冷靜，觀察小朋友。除非出現危險嘅情況，否則爸爸媽媽唔好叫醒小朋友，靜心等待呢個情況完結，小朋友就會繼續瞓覺。如果小朋友出現夜驚嘅時候，父母叫醒佢哋，好可能會令佢哋更加激動，好難平復心情再瞓番。
Commentaires