「出街BB喺車仔瞓唔到覺，點算？」
「BB愈大愈唔肯喺car seat瞓覺，可以點？」
經常都會有媽媽問點樣可以令BB出街嘅時候都瞓到覺 🤔 如果大家有睇過我之前嘅分享，都會知道我建議BB絕大部份時間應該喺固定嘅地方休息，父母應該盡量安排BB清醒嘅時間外出，以減少對佢哋睡眠嘅影響😉
不過，偶然同BB出街耐少少都係好正常，如果遇到呢種情況，可以參考吓以下嘅小貼士，等BB出街喺嬰兒車或者car seat都可以盡量瞓多少少，避免因為出街而休息不足、過分疲累。
1️⃣ 盡量令睡眠環境黑暗
黑暗嘅環境除咗可以促進褪黑激素嘅分泌，亦可以減少外在環境嘅刺激，令BB更容易瞓着。父母可以拉低嬰兒車嘅車罩，或者用件衫冚住嬰兒車，盡量令嬰兒車內嘅環境黑暗啲。但記得要注意空氣流通，如果太焗/太熱， BB都會好難瞓得到㗎！
2️⃣ 帶備安撫公仔/安撫毛巾/安撫奶嘴
如果BB習慣需要安撫物品陪伴入睡，外出時間比較長嘅時候記得要帶埋呢啲物品呀！
3️⃣ 做簡短嘅睡前儀式
就算出街，BB小睡前都應該有簡短嘅睡前儀式，等BB心理上都準備好要瞓覺。如果平時喺屋企小睡前都會同BB聽吓柔和嘅音樂或者唱吓歌先瞓，出街嘅時候都可以盡量維持呢啲方式，等佢哋知道係時候要休息一陣😴
4️⃣ 用搖晃嘅感覺幫BB入睡
父母可以借用嬰兒車或者私家車搖晃嘅感覺幫BB入睡。想佢哋瞓得長啲就要keep住搖晃嘅感覺，如果佢哋瞓着咗就停止搖晃嘅感覺，佢哋好可能瞓一個睡眠周期就會醒喇😉
Comments