最近見到呢款「星星小夜燈*」嘅廣告，亦知道喺一啲媽媽谷都有人sell呢種產品，聲稱可以安撫BB，等佢哋唔怕黑、瞓得好 … 仲方便媽媽半夜餵奶…
其實BB係唔怕黑㗎！房間夠黑嘅話，佢哋反而會覺得好舒服、好安穩，因為就好似佢哋以前喺媽媽肚入面咁樣漆黑一片，更有安全感。而且黑暗嘅環境係有助分泌褪黑激素(melatonin)，褪黑激素係一種睡眠荷爾蒙，可以令BB較容易入睡同安睡。嬰幼兒要去到至少2-3歲，開始有更多嘅想像力，先會有怕黑嘅情況出現㗎！
當小朋友去到幼兒階段真係對黑暗嘅房間產生不安同恐懼嘅感覺，微弱嘅小夜燈的確可以幫到手，但係絕對唔係五光十色嘅「星星小夜燈*」！
類似產品所發出嘅光線五光十色，大多以白光同藍光為主，會干擾BB嘅睡眠、抑壓睡眠荷爾蒙分泌 … 加上呢啲產品出嚟嘅效果有機會對BB嚟講係一種刺激 😖 大人會覺得咁樣好靚，但係BB認識嘅嘢唔多，咁樣嘅效果可能會嚇親佢哋㗎！所以呢款產品係唔會令BB更容易入睡同安睡㗎😓 如果半夜餵奶開咁樣嘅燈… 仲會刺激到BB令佢飲完奶更難瞓番！
*相片只係參考，並非實際產品
Comments