【由嬰兒床轉兒童床…】

「小朋友越大越鍾意瞓大人床，其實轉兒童床係咪會令佢更鍾意瞓覺，乖乖地留喺床上呢？」

「BB床就快唔啱，係咪時候應該幫小朋友轉兒童床呢？」

以上會唔會都係你嘅疑問？

周不時都有好多媽媽問應該幾時幫小朋友轉兒童床，今日想同大家分享吓由嬰兒床轉兒童床嘅時候，父母可以考慮嘅因素😉

一般嚟講，大部份小朋友會喺1.5-3.5歲期間轉兒童床，但如果小朋友無特別抗拒瞓嬰兒床的話，越遲轉兒童床係越好。因為嬰幼兒喺2.5-3歲之前，並無乜自控能力可以乖乖地留喺床上，無咗四邊圍住嘅嬰兒床，佢哋可以隨時隨地走落床，就可能會衍生更多睡眠問題🙈

父母喺考慮幫小朋友轉兒童床嘅時候，可以衡量以下嘅因素：

-會唔會有安全顧慮？BB會唔會已經嘗試爬出嬰兒床？有冇其他方法可以釋除呢個安全問題（例如用包腳睡袋、拎走嬰兒床上可以比小朋友借力嘅物件）？

-嬰兒床係咪已經完全無晒位，床頭床尾都頂住？

-小朋友係咪準備好轉床？佢會唔會已經多次同你講想轉兒童床？

-小朋友係咪戒緊片，識得自己落床去廁所？

-小朋友嘅睡眠狀況係咪大致穩定，現時無睡眠問題？

有啲家庭就快迎接「二寶」嘅來臨時，都可能會考慮幫「大寶」轉兒童床，呢個可以係其中一個考慮因素。父母可以衡量下大寶係咪真係準備好，明白自己應該要留喺床上乖乖地瞓覺，定係買張新嘅嬰兒床比二寶會更適合😉 每個小朋友都係獨一無二，父母要多觀察多留意小朋友嘅內心感受同行為表現，搵出一個最適合自己家庭嘅方法😊