有好多人都認為，如果BB飲奶粉，佢哋會比飲母乳嘅BB瞓得長、瞓得好，因為奶粉比較「飽肚」， BB唔會因為肚餓而扎醒。其實呢個講法唔係一定啱㗎！
母乳BB都可以好快戒夜奶，都可以瞓得好，奶粉BB都有機會有夜醒問題，都會醒左搵奶奶飲，都唔一定會瞓得耐啲㗎！4-6個月大開始，BB夜晚已經有能力瞓10至12個鐘，有啲BB唔需要夜奶，有啲可能仍需要夜晚飲奶，當中有飲母乳嘅BB，亦有飲奶粉BB㗎！
一項研究比較咗三個月大嘅BB夜晚嘅睡眠情況，結果發現由出世開始全母乳餵哺嘅BB，比全奶粉餵哺嘅BB 喺出世頭幾個月夜晚會瞓得較多。母乳BB亦受惠於來自母乳嘅褪黑激素 (melatonin)，BB剛剛出世嘅時候唔能夠自己產生呢種睡眠荷爾蒙，所以喺母乳當中嘅褪黑激素其實可以幫助BB調節佢哋嘅生理時鐘，改善佢哋嘅睡眠質素。但當然，如果媽媽母乳唔足夠，母乳BB的確有可能因為飲奶量不足，夜晚容易肚餓而瞓得唔太安穩。
到底係奶粉BB會瞓得好啲定母乳BB瞓得好啲，其實並無一個絕對嘅答案。嬰幼兒睡眠受好多因素影響，飲奶只係其中一個可能影響睡眠嘅因素。記住，奶粉BB同母乳BB都可以瞓得好㗎！無論係餵母乳定係餵奶粉，最緊要係BB食得開心、媽媽餵得舒服😉
Comments